صباح الخير يامصر

عمار يامصر .. عمار بناسك..عمار بشعبك..عمار بشبابك
الشباب اللى زى الورد ..الشباب اللى زى الفل..الشباب اللى عرف يعلم نفسه بعيد عن مناهج وزارة تعليم فاسدة
وزارة تعليم اللى المفروض يبقى اسمها وزارة تجهيل
كلام كتير نفسى أقوله ..مشاعر كتير نفسى أطلعها..من كترها مش عارف أبدأ منين
أول كلامى حقول بالصوت العالى ..صباح الخير يامصر..صباح الخير يابلدى..ياحبيبتى..ياللى كنتى غايبة ورجعتى بعد غياب طويل
صباح الخير ياحضن دافى ..صباح الخير بقولها وأنا لأول مرة مش حاسس بخوف
مش خايف من ظابط بكام حتة نحاس على كتافه ياخدنى من غير ذنب لمركز شرطة ورثه من أجداده
مش خايف من أمين شرطة مرتشى وفاسد وحرامى
مش خايف من مخبر جاهل
مش خايف من رقاص ولا من طبال ولا من زمار كانوا ماشيين فى زفة حاكم فاسد هو وولاده
النهاردة ..وبالفم المليان أقدر أقول ..صباح الخير يامصر