التعليم

التعليم زى كل حاجة فى البلد مدعم..وطبعا التعليم زى كل حاجة مدعمة مايعلم به الا ربنا

رغيف العيش المدعم لايصلح للأكل ..الزيت المدعم ينفع لأى حاجة الا الاستعمال الآدمى..كما أن مجانية التعليم هى أكبر كدبة فى تاريخ البلد

الناس بتطفح الدم علشان يوفروا فلوس الدروس لولادهم وياريت بيتعلموا صح

ياريت نتعلم نتناقش بهدوء وبدون عصبية

مش معنى ان حد صوته عالى يبقى رأيه صح

أنا أعتقد ان الدعم عموما هو أس الفساد فى البلد

هل معقول ان الرغيف المدعم يشتريه الغنى والفقير؟؟يبقى الغنى بياكل على حساب الفقير

هل معقول ان البنزين المدعم يشتريه اللى راكب مرسيدس زى اللى راكب ميكروباس؟؟

طبعا فى المدارس المجانية الكل بيدخلها ..ابن الغنى وابن الفقير..لكن..ولكن دى هى المهم

ابن الفقير بيعتمد على الله وعلى المدرسة (اللى هى أساسا مفيش فيها تعليم ) اعتماد كلى

بينما ابن الغنى بيبقى مسجل فى نفس المدرسة بالاسم فقط..بمعنى ان ابن الغنى بيعتمد على الله وعلى المدرسين اللى بيجيبهم له أهله فى كل المواد

وبالتالى ابن الفقير بيتخرج من المدرسة كأنه مادخلش من أساسه

يبقى فين بقى المجانية اللى بنتكلم عنها

أكيد أكيد كل مشكلة لها حل..لكن مينفعش نحل مشاكلنا بالعواطف والهتافات

الفساد فى وزارة التربية والتعليم هو أساس البلاوى

ياريت نعرف ننضف وزارة التربية والتعليم